ಹೆರಾಂ ಖಾತಿರ್ ಎಲಿಯಾಸಾಚೆಂ ಮಾಗ್ಣೆಂ

ಮಡಿಕೇರಿ ಲಾಗ್ಶಿಲ್ಯಾ ಎಕಾ ಲಾನ್ಶ್ಯಾ ಹಳ್ಳೆಂತ್ ಎಲಿಯಾಸ್ ನಾಂವಾಂಚೊ ಏಕ್ ಭೋವ್ ಖಾಲ್ತೊ ಮನಿಸ್ ಜಿಯೆತಾಲೊ. ಹರ್ಯೇಕಾ ಸಾಂಜೆರ್ ಸಾತ್ ವ್ಹರಾಂಕ್ ದಿಂಬ್ಯೇರ್ ಪಡೊನ್ ತೊ ಮಾಗ್ಣೆಂ ಕರ್ನ್ ಅಸ್ತಾಲೊ. ತೊ ತಾಚೆಂ ಖಾತಿರ್ ನ್ಹಯ್ ಬಗರ್ ಹೆರಾಂ ಖಾತಿರ್ ಮಾಗೊನ್ ಅಸ್ಲೊ. ಅಪ್ಲ್ಯಾ ಸೆಜಾರ‍್ಯಾಂ ಖಾತಿರ್, ಪಿಡೆಸ್ತಾಂ ಖಾತಿರ್, ಎಕ್ಸುರ‍್ಯಾಂ ಖಾತಿರ್ ಅನಿಂ ಅಪ್ಣಾಂಚೆರ್ ವಾಯ್ಟ್ ಕೆಲ್ಲ್ಯಾ ಮನ್ಶ್ಯಾಂ  ಖಾತಿರ್ ತೊ ಮಾಗೊನ್ ಅಸ್ಲೊ.

ಏಕ್ ದೀಸ್ ಸಾಮುಯೆಲ್ ನಾಂವಾಚ್ಯಾ ಎಕಾ ಭುರ್ಗ್ಯಾನ್ ಎಲಿಯಾಸಾಚ್ಯಾ ಹ್ಯಾ ಕರ್ನ್ಯಾಂ ವಿಶಿಂ ವ್ಹಡಾ ಹುಮೆದಿನ್ ತಾಚೆಲಾಗಿಂ ವಿಚಾರ‍್ಲೆಂ ಕೀ, ಎಲಿಯಾಸ್ ಮಾಮಾ, ತುಂ ಕೆದಾಳಾಯ್ ತುಜೆ ಖಾತಿರ್ ಕಿತೆಂಚ್ ಮಾಗಾನಾಂಯ್ ಕಿತ್ಯಾಕ್?

ಎಲಿಯಾಸ್  ಹಾಸೊನ್ ಜಾಪ್ ದೀಂವ್ಕ್ ಲಾಗ್ಲೊ, ಅಮಿಂ ಕೆದಾಳಾ ಹೆರಾಂ ಖಾತಿರ್ ಮಾಗ್ತಾಂವ್, ಪಯ್ಲ್ಯಾನ್ ಅಮ್ಚೊ ಭಾವಾರ್ಥ್ ಚಡ್ತಾ, ದುಸ್ರ್ಯಾನ್ ಅಮ್ಚೇರ್ ಭೆಸಾಂವ್ ಪಡ್ತಾ ಅನಿ ಶೆವೊಟಿ ಅಮಿಂ ಕೊಣಾ ಖಾತಿರ್ ಮಾಗ್ಲಾಂ ತಾಂಚೆರಿಯ್ ದೆವಾಚೆಂ ಭೆಸಾಂವ್ ಪಡ್ತಾ.

ಪೂಣ್ ಭುರ್ಗ್ಯಾ ಸಾಮುಯೆಲಾಕ್ ಹೊ ಏಕ್ ಮಿಸ್ತೆರ್ ಜಾಂವ್ಕ್ ಪಾವ್ಲೊಂ. ಉಪ್ರಾಂತ್‍ಯಿ ಜಾಯ್ತೆ ದೀಸ್ ತೊ ಪಳೆತಾಲೊ ಎಲಿಯಾಸ್ ಸದಾಂಚೆ ಬರಿಂ ಏಕ್ ದೀಸ್ ಚುಕನಾಶೆಂ ಮಾಗ್ಣೆಂ ಕರ‍್ತಾಲೊ. ಭುರ್ಗ್ಯಾ ಸಾಮುಯೆಲಾನ್ ಅನ್ಯೇಕ್ ಸಂಗತ್ ಮತಿಕ್ ವೆಲಿ ಕೀ, ಎಲಿಯಾಸ್ ಇತ್ಲೊ ದುಬ್ಳೊ ಮನಿಸ್ ತರೀ; ತಾಕಾ ಕಿತೆಂಚ್ ಉಣೆಂಪಣ್ ತಾಚೆ ಥಂಯ್ ನಾತ್ಲೆಂ. ತಾಚ್ಯಾ ಬೆಳ್ಯಾಕ್ ಬೊರೊ ಫಳ್ ಮೆಳ್ತಾಲೊ, ತೊ ಪಿಡೆಂತ್ ಪಡನಾತ್ಲೊ, ಅನಿಂ ತಾಚ್ಯಾ ತೊಂಡಾರ್ ಕೆದಾಳಾಯ್ ಸಂತೋಸ್ ಅನಿಂ ಘರಾಂತ್ ತಾಚ್ಯಾ ಉಲ್ಲಾಸ್ ದಿಸೊನ್ ಅಸ್ಲೊ.

ಅಚನಾಕ್ ಏಕ್ ದೀಸ್ ತ್ಯಾ ಗಾಂವಾಂತ್ ದುಕೊಳ್ ಪಡ್ಲೊ. ಭುಂಯ್ ಸಾಗೊಳಿ ಸಗ್ಳಿಂ ವೊತಾಕ್ ಕರ್ಪೊನ್ ಗೆಲಿ. ಗಾಂವ್ಚೊ ಲೋಕ್ ಸಗ್ಳೊ ಕಂಗಾಳ್ ಜಾಲೊ. ಪೂಣ್ ಎಲಿಯಾಸ್ ತಾಚ್ಯಾ ಗೂಂಡ್ ಭಾವಾರ್ಥಾ ಥಾಂವ್ನ್ ಪಾವ್ಸಾ ಖಾತಿರ್ ಮಾಗ್ಣೆಂ ಕರ್ನ್ ಅಸ್ಲೊ. ಹ್ಯಾ ಪಾವ್ಟಿಯಿ ಎಲಿಯಾಸ್ ಅಪ್ಣಾಂ ಖಾತಿರ್ ನ್ಹಯ್ ಸಗ್ಳ್ಯಾ ತ್ಯಾ ಗಾಂವಾ ಖಾತಿರ್ ಮಾಗೊನ್ ಅಸ್ಲೊ.

ಥೊಡ್ಯಾ ದಿಸಾ ಉಪ್ರಾಂತ್, ದಾಟ್ ಮೋಡ್ ಅಯ್ಲೆಂ. ಗಾಂವಾಂಚೆರ್ ಪಾವ್ಸ್ ಪಡ್ಲೊ. ಗಾಂವ್ಚೊ ಲೋಕ್ ಸಂತೋಸ್ ಪಾವ್ಲೊ. ತವಳ್ ಭುರ್ಗ್ಯಾ ಸಾಮುಯೆಲಾಕ್ ಸಮ್ಜಲಿಂ ಕೀ ಎಲಿಯಾಸಾಚ್ಯಾ ತಿ ಉತ್ರಾಂ.  ಎಲಿಯಾಸಾನ್ ಹೆರಾಂ ಖಾತಿರ್ ಮಾಗ್ಣೆಂ ಕೆಲ್ಲೆಂ ವರ್ವಿಂ ತಾಚೊ ಭಾವಾರ್ಥ್ ತಾಣೆಂ ಗಟ್ಟ್ ಕೆಲ್ಲೊ. ದೆವಾಚೆ ಭೆಸಾಂವ್ ತಾಚೆರ್ ಜೋಡ್ನ್ ಘೆತ್ಲೆಂ. ಅನಿಂ ಸಗ್ಲ್ಯಾ ಗಾಂವಾಚೆರ್ ಪಾವ್ಸ್ ಸಯ್ತ್ ತಾಣೆಂ ಮಾಗೊನ್ ಘೆತ್ಲೊ ತಶೆಂಚ್ ಲೋಕ್ ಬಚಾವ್ ಜಾಲೊ.

ತ್ಯಾ ದಿಸಾ ಥಾಂವ್ನ್ ಭುರ್ಗ್ಯಾ ಸಾಮುಯೆಲಾನಿ ಹೆರಾಂ ಖಾತಿರ್ ಮಾಗೊಂಕ್ ಪ್ರಾರಂಭ್ ಕೆಲೆಂ.  ಹೆರಾಂ ಖಾತಿರ್ ಮಾಗ್ಣೆಂ ಕೆಲ್ಲೆಂ ವರ್ವಿಂ ಅಪ್ಣಾಂ ಥಂಯ್ ದೆವಾಚೆ ಭೆಸಾಂವ್ ಜೊಡುಂಕ್ ಸಕ್ತಾಲೊ ಮ್ಹುಣ್ ತೊ ಸಮ್ಜಾಲೊ. ತ್ಯಾ ದಿಸಾ ಥಾಂವ್ನ್ ಭುರ್ಗ್ಯಾ ಸಾಮುಯೆಲಾಚೆರ್ ದೆವಾಚಿ ಧಾರಾಳ್ ಅಶೀರ್ವಾದಾಂ ಪಡ್ಲಿಂ.

- ವಿವೇಕ್ ಮೊಂತೇರೊ, ಕೆಲರಾಯ್, ಕತಾರ್.