ನೆಕೆತ್ರ್ - ಮಿಸೆಲ್ಸ್

ಬೆತ್ಲೆಹೇಮಾಂಚಾ ಮೊಳ್ಬಾರ್ ನೆಕೆತ್ರ್ ದಿಸ್ಲೆಂ,

ಉದೆಂತಿಚಾ ಜಾಣಾರ್ಯಾಂಕ್ ವಾಟ್ ದಾಕೊಂವ್ಚೆ,

ಭರ್ವೊಶ್ಯಾಚೆ, ಪ್ರಕಾಶಿತ್ ಬಾಸಯ್ಲ್ಯಾ ಮೆಸ್ಸಿಯಾಚೆ,

ಸರ್ಗಿಂಚೊ ಉಜ್ವಾಡ್, ಸಂಸಾರಾಕ್ ಫಾಂಕೊಂವ್ಚೆ.

ಆಜ್ ಬೆತ್ಲೆಹೇಮಾಂಚಾ ತ್ಯಾಚ್ ಮೊಳ್ಬಾರ್,

ಮಿಸೆಲ್ಸ್ ಅನಿಂ ಬಾಂಬ್ ಕಾಳೊಕಾಚೊ ಧುವರ್,

ಝುಜಾಚಿ ಬೊಬಾಟ್ - ಕೊಣೀ ನಾ ಶಾಭಿತ್,

ಶಾಂತಿ ತ್ಯಾ ದೀಸ್, ಆಜ್ ದೆಸ್ವಾಟ್ ಮನ್ಶ್ಯಾ ಜಾತ್.

ಝುಜಾ ಮೊಡಾಂ ಇಡ್ಯಾಂತಿ ತುಜೆ ನೆಕೆತ್ರ್ ಅಸ್ತಲೆಂ,

ಸಾಸ್ಣಿಕ್ ತುಜೊ ಮೋಗ್, ಮಾಗ್ತಾಂ ತುಜಿ ಕಾಕ್ಳುತ್,

ದುಖಿಚಾ, ರುದನಾಚಾ ಕಾಳೊಕಿ ಸಂಸಾರಾರ್,

ಮಿಸೆಲ್ಸ್, ಬಾಂಬ್ ಮಧೆಂಯ್ ಉದೆಂವ್ದಿ ತುಜೆ ನೆಕೆತ್ರ್.

ಎಕಾಚ್ ತುಜ್ಯಾ ಉತ್ರಾನ್ ಸೊಮ್ಯಾ ವಾದಾಳ್ ರಾವ್ಲೆಂ,

ಫರ್ಮಾಯ್ ತುಜ್ಯಾ ಜಲ್ಮಾ ಗಾವಾಂತ್; ರಾವೊಂ ಝುಜ್, 

ಶಿಕಯ್ ಮನ್ಶ್ಯಾಕುಳಾಕ್ ಮೊಗಾಚೊ ನೀಜ್ ಅರ್ಥ್, 

ಶಾಂತಿ ತುಜಿ ರಾಜ್ ಕರುಂ ಝುಜಾ ಥಳಾರ್.

*ವಿವೇಕ್ ಮೊಂತೇರೊ, ಕೆಲರಾಯ್ - ಕತಾರ್.